ACEBE CCA colabora na venda dos calendarios solidarios Noel Balsa González

Xa están á venda os calendarios solidarios Noel Balsa González que edita o IES Francisco Aguiar de Betanzos co patrocinio da Fundación Mª José Jove en favor de Cris Contra el Cáncer. Este é o quinto ano consecutivo no que o centro leva a cabo esta iniciativa que ten como finalidade recadar fondos para a loita contra o cancro infantil.

ACEBE CCA colabora de novo co IES Francisco Aguiar na venda dos calendarios que xa poden mercarse nas oficinas da asociación (de luns a venres en horario de 10.00 a 14.00 horas) e nunha decena de establecementos asociados. Tamén poden adquirirse na Secretaría do IES Francisco Aguiar.

Os negocios nos que poderán atopar os calendarios, a un prezo de 5 euros, son os seguintes: Óptica Brigantium, BC Iluminación, Peluquería Onda, Óptica Selgas, Miraquelinda, Chocolat, Larpeiradas Babel, O Ekolar, Graf Moda Joven, Ortopedia Betanzos, Xoma Kids, Libraría Biblos e La Pelu de Nana.

Os establecementos asociados a ACEBE CCA que desexen colaborar coa venda poden contactar coas oficinas da asociación no teléfono 981774574, por whatsapp no 618829804 ou a través do correo electrónico acebe@comerciodebetanzos.com.

Os calendarios están ilustrados con debuxos de alumnos e alumnas do IES Francisco Aguiar e, ademais dos doce meses do ano, contan cun apéndice con outras tantas ilustracións que conforman o denominado “calendario alternativo”.