ACEBE CCA organiza un concurso para encher Betanzos de globos

ACEBE CCA convoca un concurso para encher Betanzos de globos no que poderán participar todas as persoas que o desexen elaborando un globo no formato que elixan: maqueta, manualidade, fotografía, cartel, etc.

Unha vez feito, deberán fotografiar o seu globo e entregar a fotografía nalgún establecemento asociado a ACEBE CCA para que o expoña no seu escaparate. Tamén poden deixar o orixinal en aqueles establecementos que teñan sitio ou que estean dispostos a expoñelos, consultando previamente co responsable do establecemento. Pode consultar a lista de negocios asociados a ACEBE CCA aquí.

Despois terán que enviar a foto, acompañada do seu nome e apelidos, teléfono de contacto e nome do negocio no que está exposta a imaxe ao correo electrónico betanzosacebe@gmail.com ou por whatsApp ao número 618829804. O prazo para enviar as fotografías remata o 27 de agosto.

O 29 de agosto reunirase o xurado para elixir as fotografías gañadoras e outorgaranse tres premios que foron aportados polo Concello de Betanzos. Un primeiro de 100 euros, un segundo de 50 euros e un terceiro de 30 euros para gastar nos establecementos asociados a ACEBE CCA. Poden consultar aquí as bases.

Decoración dos escaparates

Esta iniciativa xurdiu a raíz dunha proposta dun dos negocios asociados a ACEBE CCA que consistía en animar aos socios e socias a que decoren os seus escaparates con globos, en recordo do símbolo que representa para a cidade o Globo de Betanzos, ausente este ano das festas de San Roque. Son varios os negocios que decoraron xa os seus escaparates con elementos que recordan ao famoso aerostato e dende a directiva animan a todos os seus socios e socias a que o fagan.