ACEBE CCA organiza unha nova edición de MercaBetanzos a primeira fin de semana de setembro

ACEBE CCA organiza durante a fin de semana do 5 e 6 de setembro unha nova edición de MercaBetanzos, o mercado de oportunidades do comercio local, que se desenvolverá nunha carpa instalada na praza Irmáns García Naveira e no que se darán cita 15 negocios locais.

O mercado está concebido para que os comercios participantes poidan vender os seus produtos de stock a prezos reducidos antes do inicio da nova temporada. Os clientes teñen así a oportunidade de comprar produtos de primeira calidade moi rebaixados e procedentes de comercios e empresas locais e de confianza. Ademais, MercaBetanzos constitúe para os establecementos que participan unha oportunidade única de promoción e de captación de novos clientes, ao centralizar as vendas nun espazo céntrico e no marco dun evento que adoita atraer a numeroso público, tanto de Betanzos como das localidades do entorno.

A carpa, duns 350 metros cadrados, disporá de probadores con espellos para que as persoas que o desexen poidan probar as prendas e complementos antes de compralos.

O horario do mercado será ininterrompido, para facilitar as compras: o sábado 5 abrirá ás 11.00 horas e pechará ás 21.00 horas e o domingo 6 o horario de apertura ao público será de 11.00 a 19.30 horas.

Ademais, o domingo día 6, ás 13.30 horas haberá sesión vermú co grupo The Cans.

Negocios participantes

Acudirán ao evento comercios e empresas de diferentes sectores: alimentación, moda e complementos para home e muller, roupa e calzado deportivo, moda infantil, óptica, parafarmacia e herboristería, lencería e baño e servizos sanitarios.

Os negocios que participarán na feira de oportunidades son: Aceitunas La Pastora, Atleet Todo Deporte, Bicos, CMUC- Centro Multidisciplinar de Úlceras Crónicas, Confecciones Chela, Chocolat, Dans, Distrito Palmeras, Isi moda y complementos, Lencería Alicia, Miraquélinda, Óptica-Parafarmacia-Herboristería Selgas, Tartaruga, Traviesa e Xoma Kids.

MercaBetanzos está organizado por ACEBE CCA e cofinanciado pola Xunta de Galicia e o Concello de Betanzos.