ACEBE CCA organiza unha nova edición de MercaBetanzos os días 29 e 30 de marzo no Liceo

A planta alta do Edificio Liceo será o escenario dunha nova edición de MercaBetanzos, o mercado de oportunidades do comercio local, organizado por ACEBE CCA e no que están inscritos 14 negocios de diferentes sectores.

Moda e complementos, lencería e baño, moda infantil, perruquería, libros, alimentación, óptica e parafarmacia estarán representados nesta nova edición de MercaBetanzos que se desenvolverá os días 29 e 30 de marzo en horario ininterrompido. O sábado de 11.00 a 21.00 horas e o domingo de 11.00 a 19.30 horas.

Nesta ocasión sumáronse á iniciativa 14 comercios: Aceitunas La Pastora, Bicos, Chocolat, Dans, Distrito Palmeras, El Cantón Ropa Interior, Libraría Biblos, Lencería Alicia, Miraquélinda, Mirropa, Óptica-Parafarmacia-Herboristería Selgas, Peluquería Beatriz 13, Tartaruga e Xoma Kids.

MercaBetanzos ofrece a oportunidade aos negocios participantes de liquidar os seus stocks de temporada nun entorno común no que se dan cita diferentes tipos de comercios e empresas que poñen á venda produtos de primeira calidade a prezos moi rebaixados.

Os clientes teñen así a ocasión ideal para mercar artigos moi rebaixados e nun espazo no que atoparán unha ampla variedade de opcións nunha mesma estancia. Ademais da venda de produtos con importantes descontos, para os negocios inscritos esta feira constitúe unha boa forma de promoción.

Durante os dous días que dura o evento haberá un posto solidario de elaboración e venda de filloas atendido por persoal voluntario de Manos Unidas, e algunha sorpresa máis.

MercaBetanzos está organizado por ACEBE CCA e subvencionado pola Xunta de Galicia, a Deputación da Coruña e o Concello de Betanzos.