ACEBE CCA pon en marcha a campaña de envíos gratuítos para as vendas en liña

ACEBE CCA puxo en marcha o servizo de envíos gratuítos para as vendas en liña ao que polo momento se sumaron un total de 18 comercios. Trátase dunha prestación exclusiva para comercios asociados coa finalidade de axudar a impulsar a competitividade do comercio local no mercado global de Internet.

Os negocios inscritos polo momento son: Lencería Alicia, Miraquelinda, Rocigarcía, Cuore Boutique, Librería Brea, Parafarmacia e Óptica  Selgas, Manuela Ferreira Decoración, El Cantón Ropa Interior, Chocolat, Xoma Kids, Dans, Distrito Palmeras, Maskesueños, Freesia, Bicoca Moda Home, Isi , Tocho Comercial e Tartaruga.

A Asociación financiará os custes de ata un máximo de 15 envíos ao mes por cada comercio, un límite que se revisará máis adiante en función do consumo e das novas inscricións.

Os comercios inscritos poderán ofrecer así o envío gratuíto das compras que os seus clientes realicen nos seus negocios a través das súas páxinas web ou das redes sociais. Os envíos realizaranse a través da sucursal de MRW de Betanzos que xa contactou cos diferentes comercios apuntados para explicar as condicións da prestación.

O servizo estará subvencionado pola Xunta de Galicia a través das Subvencións ás asociacións de comerciantes sen fins de lucro para a dinamización dos centros comerciais abertos de Galicia, e estará activo ata o vindeiro mes de outubro ou ata que se esgote o crédito concedido pola Consellería.

Os comercios asociados a ACEBE CCA que desexen inscribirse poden facelo enviando un correo electrónico a: acebe@comerciodebetanzos.com ou comunicándose coa asociación no teléfono 981774574 de luns a venres en horario de 10.00 a 14.00 horas.