ACEBE CCA pon en marcha a campaña de envíos gratuítos para vendas en liña

ACEBE CCA acaba de poñer en marcha a campaña de envíos gratuítos para as vendas en liña da que poderán beneficiarse os negocios asociados que se inscriban previamente.

Ata o momento xa se apuntaron máis dunha quincena de comercios aos que a asociación subvencionará ata un máximo de 100 euros mensuais. Esta cifra poderá variar dependendo do número de envíos realizados e das novas inscricións.

Os negocios inscritos na campaña son: Cuore, El Cantón Ropa Interior, Rocigarcia, Lencería Alicia, Óptica-Parafarmacia-Herboristería Selgas, Miraquélinda, Manuela Ferreira, Distrito Palmeras, Bicoca Moda Home, Librería Brea, Xoma Kids, Freesia, Tocho Comercial, Dans, Tartaruga, Maskesueños, Chocolat e Libraría Biblos.

Trátase dunha campaña exclusiva para comercios asociados e que conta cunha subvención da Dirección Xeral de Comercio. A iniciativa estará en activo ata o vindeiro mes de setembro, se ben podería rematar anticipadamente no caso de que se esgote o crédito asignado.

Os comercios asociados que o desexen poden inscribirse enviando un correo electrónico a acebe@comerciodebetanzos.com, enviando unha mensaxe ao 618829804 ou chamando ao 981774574.