ACEBE CCA recibiu o 2026 cunhas badaladas anticipadas na Praza da Constitución

A directiva de ACEBE CCA organizou o 31 de decembro ás dúas da tarde un recibimento especial para o ano novo convocando á cidadanía a participar nunhas badaladas anticipadas na Praza da Constitución.

A asociación convidou ás persoas asistentes a bebidas para o brinde e entregou bolsas con doce golosinas para tomar ao son das badaladas que soaron pola megafonía.

A expectación xerada superou as previsións da asociación que tivo que improvisar para que ningunha das persoas asistentes quedase sen a súa bolsa de doces que foron repartidas por voluntarias da directiva.

Á cita tamén se sumaron comerciantes e empresarios asociados a ACEBE CCA e representantes dos tres partidos políticos municipais.

Agradecementos

A directiva da asociación agradeceu a todas as persoas que acudiron á Praza da Constitución para participar deste evento que o colectivo organizaba por primeira vez.

Ademais, expresaron o seu agradecemento especial para as persoas, empresas e entidades que colaboraron na organización e loxística, en especial ao Concello de Betanzos, a Gadisa e a Queique Bar.

A presidenta da asociación, María Luisa Pérez Iglesias, mostrou a súa satisfacción pola boa resposta da cidadanía e pola alta participación de público e avanzou que a intención da directiva é volver a organizar de novo un evento similar para o vindeiro ano.