Sanidade inicia mañá un cribado en Betanzos a 8.000 persoas de entre 18 e 60 anos

Uns 8.000 veciños e veciñas de Betanzos de entre 18 e 60 anos serán convocados a partir de mañá xoves para someterse a unha proba PCR para detectar posibles casos asintomáticos. Será o Sergas quen cite ás persoas incluídas nesta franxa de idade mediante un SMS para que acudan a realizar o test.

O cribado, confirmado esta mañá pola Xerencia da área sanitaria de A Coruña, levarase a cabo durante un periodo de dez días e prevese realizar unhas 800 probas diarias. O dispositivo de control instalarase no pavillón municipal de O Carregal, en horario de 9.30 a 14.00 horas e de 16.00 a 20.30 horas (agás o domingo).

Foi o Concello quen solicitou hai uns días este control ante a suba de casos confirmados na localidade que, a día de hoxe, é de 208. A alcaldesa, María Barral, pide “a colaboración máxima” dos veciños á hora de someterse ao test: “Cremos que é necesario que todo o mundo colabore e que asistan a facerse a proba ante a actual situación e o crecemento experimentado nos últimos días”, dixo.

Con todo, Barral advirte de que “se despracen só as persoas que reciban a convocatoria do Sergas, que vai ir avisando pouco a pouco durante os próximos días”.

A alcaldesa agradeceu a disposición dos responsables da xerencia da área sanitaria, a quen ofreceu a total colaboración para efectuar as probas. O Concello porá á súa disposición persoal para o desenvolvemento dos dispositivos de control e axudar así aos técnicos de Sanidade.