O Concello abre o prazo para apuntarse ao sorteo de entradas para o concerto de Leo Nucci

O Concello sorteará 225 entradas dobres para asistir ao concerto que o barítono Leo Nucci ofrecerá o 13 de febreiro ás 20.30 horas na igrexa de San Francisco co que se pecharán os actos de celebración do 800 aniversario do traslado da cidade. Esta será, ademais, a última actuación de Nucci en España, logo de anunciar a súa retirada dos escearios.

As persoas que desexen conseguir unha das entradas dobres que se sortean deberán apuntarse na Oficina de Turismo ou realizar a inscrición telemática a través da páxina web municipal: www.betanzos.gal, a partir do venres 31.

Para facilitar as inscricións, a Oficina de Turismo abrirá o venres en horario de 10.00 a 14.00 horas e de 16.00 a 19.00 horas. O sábado, de 10.00 a 14.00 horas e o luns e o martes de 10.00 a 14.00 horas e de 16.00 a 19.00 horas.

O sorteo das entradas será público e realizarase o día 6 de febreiro ás 12.00 horas na Sala Azul do Edificio Arquivo Liceo. Ao igual que acontecera no concerto de Carlos Núñez, que abriu a celebración do VIII Centenario, extraerase unha letra que marcará o apelido a partir do que se outorgarán as entradas. Terán prioridade as persoas empadroadas en Betanzos.