Comeza en Betanzos un novo programa universitario para maiores de 50 anos

Comeza en Betanzos unha nova edición do programa universitario para maiores de 50 anos que o Concello organiza en colaboración coa Universidade da Coruña. Trátase dun programa formativo específico para este sector de poboación que se vai desenvolver nos meses de outubro e novembro.

A actividade inclúe tres seminarios impartidos por profesorado da Universidade da Coruña con sesións teóricas e prácticas ou saídas de campo.

O programa comezará os días 16, 17 e 23 de outubro cun seminario titulado “Sustentabilidade social e económica” que se completará con actividades sobre economía circular, socioloxía e paisaxe cultural.

Os días 30 e 31 de outubro e 6 de novembro impartirase o seminario “Sustentabilidade ambiental”, no que se falará sobre educación para a sustentabilidade, novos materiais sostibles e sustentabilidade ambiental.

Os días 13, 14 e 20 de novembro impartirase o seminario “Saúde e benestar”, con actividades sobre educación para a alimentación e nutrición, actividade física e ergonómica e ferramentas para o control do estrés.

A alcaldesa de Betanzos, María Barral, agradeceu “o traballo e interese posto pola Universidade da Coruña para facer realidade este proxecto”, dixo, e extendeu o seu agradecemento á vicerreitora de Oferta Académica e Innovación Educativa e á directora da Universidad Sénior.