Emotivo reencontro no 25 aniversario da Banda Municipal de Música de Betanzos

O tradicional Concerto Extraordinario de Nadal da Banda Municipal de Música de Betanzos converteuse nesta ocasión nunha festa conmemorativa do 25 aniversario da súa fundación.

Sobre o esceario, os músicos que actualmente compoñen a agrupación baixo a dirección de Juan Ferrer que tocaron pezas clásicas, cancións típicas de Nadal e mesmo bandas sonoras de películas nunha espectacular actuación celebrada o pasado 30 de decembro na Igrexa de San Francisco que quedou pequena para acoller ó numeroso público asistente. Xunto a eles, o coro do conservatorio e moitos dos músicos que nalgún momento formaron parte da banda ó longo deste cuarto de século de andaina.

Foi un emotivo reencontro no que houbo momentos para o recordo daqueles integrantes hoxe desaparecidos e no que se recoñeceu o esforzo e adicación dos músicos e directores.

O Alcalde, Ramón García, destacou a traxectoria da Banda dende "aquel proxecto que nacía en 1990 e que foi medrando grazas ó traballo e sacrificio dos directores e músicos ata o día de hoxe, coa calidade que atesoura en cada unha das actuacións", dixo, e incidiu nos "25 anos de constante crecemento, de alegrías, de satisfaccións, mais tamén de traballo, de sacrificios, de adicación e compromiso, de quitarlle tempo aos amigos, a outras afeccións...", comentou.

García entregou placas conmemorativas a cada un dos directores que tivo a banda, ós seus integrantes, á Asociación Amigos da Banda, á comunidade Nais Franciscanas e ao ex-concelleiro de Cultura, Francisco Díaz Pereira e salientou que "é un motivo de orgullo para todos os betanceiros e betanceiras esta agrupación que recibe recoñecementos alí onde está".

Ante a previsión do numeroso público asistente, ampliouse o aforo da igrexa cunha plataforma no fondo rodeando o Sepulcro de Fernán Pérez de Andrade.

A celebración rematou cunha festa no Edificio do Antigo Matadoiro no que se reuniron diferentes xeracións de músicos que formaron parte desta prestixiosa formación que, tal e como dixo García: "de-sexamos que a Banda siga medrando, que os betanceiros sigamos tendo o privilexio de escoitar e sentir a súa música e que siga a ser embaixadora de Betanzos como o foi durante estes 25 anos".