A Xunta activa os programas de axudas a microempresas e hostalería

A Xunta de Galicia acaba de abrir o prazo de solicitude de dous novos programas de axudas destinadas a microempresas e a hostalería que completan o Plan de rescate do goberno autonómico aos sectores máis afectados pola pandemia.

O programa orientado a microempresas e hostalería aportará 4.000 euros nun pago único en dúas anualidades para aquelas microempresas que se acolleran a ERTE desde a declaración do Estado de Alarma e que declarasen perdas do 50% no ano 2020. As actividades económicas especialmente paralizadas ou as empresas con máis de 10 persoas traballadoras destes sectores recibirán 5.000 euros.

As beneficiarias das subvencións deberán manter a actividade económica e o emprego durante seis meses desde a publicación da orde de axudas.

Ademais, abriuse a convocatoria dun programa de axudas automáticas ao sector da hostalería pechado do que poderán beneficiarse autónomos, microempresas, pemes ou traballadores autónomos con persoal ao seu cargo do sector de hostalería, hoteis, hostais, casas rurais e outro tipo de aloxamentos afectados por peche conforme ás directrices das autoridades sanitarias.

Neste caso, a Xunta apoiará con 1.500 euros mensuais, desde o mes de outubro, para peches mínimos de dúas semanas. As empresas de máis de 10 persoas traballadoras recibirán 2.000 euros ao mes, contados dende outubro. Estas axudas serán compatibles con outras do Plan de Rescate da Xunta e doutras administracións públicas.

O prazo de presentación de solicitudes será dun mes contado dende o 28 de novembro, data de publicación da orde.

O Plan completa a liña de subvencións convocadas hai uns días para persoas traballadoras por conta propia, dotadas con 1.200 euros para os autónomos de calquera actividade económica, con e sen persoal contratado ao seu cargo, e con 2.000 euros para autónomos que pertenzan a sectores ou actividades económicas especialmente paralizadas.