A Campaña de Outono de ACEBE sortea dous bonos de 75 euros cada un

ACEBE CCA poñerá en marcha entre o 25 de setembro e o 13 de outubro a Campaña de Outono na que sorteará dous bonos de 75 euros cada un entre os clientes que realicen as súas compras nos negocios asociados.

Esta nova acción promocional de ACEBE CCA ten como finalidade contribuír a fomentar o consumo nos comercios, empresas e locais de hostalería asociados á entidade ofrecendo un incentivo aos clientes polas súas compras. Ademais, tamén se busca promocionar a aplicación móbil de ACEBE CCA que a entidade puxo en marcha hai uns anos.

Como participar

Para participar no sorteo, os clientes deberán descargar a aplicación AcebeCCA (dispoñible para Android e IOS), unha vez rexistrados deberán entrar na "Campaña de Outono" e subir os tíckets de compras realizadas entre o 25 de setembro e o 13 de outubro en establecementos asociados, ata xuntar 300 euros. Unha vez completada a cantidade de 300 euros poderán seguir participando con outros tíckets para ter máis posibilidades de gañar algún dos premios que se sortearán.

O sorteo efecturarase o 14 de outubro mediante unha ferramenta dixital que elixirá ao azar ás persoas gañadoras. O persoal da asociación comprobará que estas cumpren cos requisitos establecidos nas bases e, no caso de que non sexa así, realizarase un novo sorteo.

Como canxear os bonos

O persoal da asociación contactará coas persoas agraciadas para concertar unha cita e poder activar os bonos nas súas respectivas app e poderán canxealos en calquera dos negocios asociados a ACEBE CCA amosando o código QR no momento de realizar o pagamento dunha compra.

Poderán gastalo integramente nun único establecemento ou realizando varias compras en negocios diferentes, ata esgotar o saldo de 75 euros. A data límite para gastar o importe do bono será o 14 de novembro deste ano. Unha vez pasada esta data quedará invalidado.

Na campaña só poden participar persoas maiores de 18 anos e os titulares de negocios asociados e o persoal traballador non poderán participar con tíckets dos seus propios establecementos pero si cos doutras empresas asociadas. 

Esta acción promocional de ACEBE CCA está cofinanciada pola Xunta de Galicia e o Concello de Betanzos.

A aplicación Acebecca pode descargarse desde PlayStore ou AppStore, ou a través dos seguintes enlaces: 

ANDROID:https://play.google.com/store/apps/details?id=es.bitnorte.acebecca
iPHONE: https://apps.apple.com/es/app/acebecca/id6444877936