A restauración do Estanque do Retiro custará ao redor de 525.000 euros e sairá a licitación nuns meses

A alcaldesa, María Barral, xunto aos arquitectos Xan Casabella e Xosé Díaz Vieites

O Concello conta de sacar a licitación o proxecto de conservación e restauración do Estanque do Retiro “no prazo máis breve posible, aínda que levará uns meses xa que se trata dunha obra moi complexa”, explicou a alcaldesa, María Barral, quen, xunto cos arquitectos responsables do proxecto, Xan Casabella e Xosé Díaz Vieites, avanzou algúns dos detalles de como se levará a cabo a recuperación desta parte do parque.

O proxecto, que ten un orzamento de ao redor de 525.000 euros, recibiu a autorización da Dirección Xeral de Patrimonio e foi remitido á Deputación da Coruña que se comprometera a aportar 600.000 euros para o Pasatempo aos que o Concello suma outros 150.000.

Tal e como explicou María Barral, o proceso será lento xa que neste momento se atopa en redacción o convenio que a Deputación e o Concello asinarán para o financiamento das obras. Unha vez asinado o convenio procederase á redacción dos pregos para sacar a licitación os traballos. “Queremos ser moi coidadosos nos prazos xa que é un tema moi complexo, non é unha obra calquera”, dixo Barral.

Un modelo para posteriores restauracións

“O Estanque do Retiro é unha peza moi singular, moi ben delimitada e que servirá como modelo para posteriores restauracións no Pasatempo”, así o explicou o arquitecto Xan Casabella, un dos técnicos responsable do proxecto, xunto con Xosé Díaz Vieites.

Ambos os dous avanzaron algúns dos pormenores dos traballos que se van levar a cabo e que precisarán da intervención dun equipo multidisciplinar. Restaurarase a cornisa superior do muro que rodea o estanque e a varanda metálica, reforzaranse os muros perimetrais e restaurarase o templete. Tamén se reparará o túnel de acceso para evitar a entrada de humidades e a ponte que conecta o paseo que rodea o estanque  co templete.

Con respecto ás pezas escultóricas, os técnicos subliñaron que “só se reconstruirán aquelas das que existe documentación gráfica suficiente”, dixeron: “Non imos crear falsas expectativas”. Con todo, realizarase un exhaustivo traballo de análise das diferentes capas das pezas existentes para atopar as cores orixinais e tratar de recuperalas: “empregarase o mesmo sistema que se utilizou no Pórtico da Gloria”, explicaron.

A limpeza previa do estanque, de onde se retiraron unhas 150 toneladas de lodo, foi importante xa que apareceron moitas pezas que se atopaban no fondo, algunhas das cales son orixinais e poderán utilizarse para recompoñer figuras incompletas.

Unha vez que comecen os traballos, as estimacións dos técnicos apuntan a que durarán uns 15 meses, contando con que estivesen catro restauradores traballando ao mesmo tempo.

Reclamación á Xunta

María Barral reclamou de novo a colaboración económica da Xunta de Galicia “creo que é o xusto que a Xunta colabore, como mínimo, na mesma medida en que o fai a Deputación xa que se trata dun parque único e singular en Galicia”, dixo.

A alcaldesa subliñou que “dende o principio contamos co apoio de Patrimonio e agardamos que o expediente de declaración BIC se resolva a principios deste ano. Pero cremos que é de xustiza que a Xunta participe tamén económicamente”, dixo.


Novas relacionadas


A PLATAFORMA SOS HOSTELERÍA BETANZOS CONVOCA UNHA CONCENTRACIÓN O MÉRCORES 24 PARA RECLAMAR UN PLAN DE RESCATE

23/02/2021

A plataforma SOS Hostelería Betanzos, da que forman parte case un cento de hostaleiros locais, convoca para o mércores 24 ás 12.00 horas unha conce...


leer máis


O SERGAS DETECTA EN BETANZOS TRINTA POSITIVOS DURANTE O CRIBADO POBOACIONAL

10/02/2021

Un total de 30 positivos foron detectados no cribado poboacional que o Sergas realizou en Betanzos entre o 28 de xaneiro e o 6 de febreiro e ao que fo...


leer máis


SANIDADE INICIA MAÑÁ UN CRIBADO EN BETANZOS A 8.000 PERSOAS DE ENTRE 18 E 60 ANOS

27/01/2021

Uns 8.000 veciños e veciñas de Betanzos de entre 18 e 60 anos serán convocados a partir de mañá xoves para someterse a unha proba PCR para detect...


leer máis


O CONCELLO PON EN MARCHA UNHA CAMPAÑA PARA INCENTIVAR O CONSUMO LOCAL CON 6.000 EUROS EN TARXETAS REGALO

23/11/2020

O Concello de Betanzos pon en marcha en decembro a campaña “Merca, tan cerca”, unha acción de apoio ao tecido comercial, empresarial e hostaleir...


leer máis