A Sinfónica de Galicia ofrecerá en Betanzos un concerto "único" promovido polo Concello e ABANCA

De esq. a dta.: o xerente da OSG, Andrés Lacasa, a alcaldesa, María Barral, e Javier Etcheverría trala presentación do concerto

A Orquestra Sinfónica de Galicia (OSG) actuará por primeira vez en Betanzos nun concerto ao aire libre e gratuito na Praza dos Irmáns García Naveira promovido polo Concello de Betanzos e por ABANCA.

A cita será o 22 de agosto ás 21.00 horas e forma parte dos Concertos Extraordinarios da OSG e da programación do Concello de Betanzos con motivo do 800 aniversario do traslado da cidade.

A alcaldesa, María Barral, xunto ao presidente de Honra de ABANCA, Javier Etcheverría, e o xerente da OSG, Andrés Lacasa, presentaron o acordo que permitirá traer a Betanzos este concerto.

María Barral agradeceu a "colaboración extraordinaria de ABANCA co 800 aniversario e o interese mostrado, persoalmente por Javier Etcheverría, fillo adoptivo de Betanzos para que este concerto sexa unha realidade en Betanzos", dixo.

Un concerto único

O concerto da Sinfónica terá un carácter único e especial, tanto polo seu repertorio, que incluirá "guiños" á cidade, como polo marco no que se desenvolverá. Baixo a dirección do mestre José Trigueros, o programa inclúe temas populares con grandes éxitos da música sinfónica como a suite "Carmen", de Georges Bizet ou o "Capricho español, op. 34", de Nikolai Rimski-Kórsakov ata música latinoamericana como a obra "Oblivion", de Astor Piazzolla, e o "Danzón nº 2" de Arturo Márquez.

O concerto rematará coa interpretación da "Danza de Xastres" que será adaptada para a ocasión por Pedro Lamas e Roberto Somoza e que será bailada polo Grupo Azougue da Escola Municipal de Folclore do Concello de Betanzos.

A actuación da Sinfónica de Galicia en prazas públicas non é frecuente e concertos como o que o público de Betanzos poderá presenciar o vindeiro 22 de agosto na Praza García Naveira só adoitan ofrecerse en lugares como María Pita, na Coruña, ou o Obradoiro, en Compostela.

A Orquestra Sinfónica de Galicia foi creada en 1992 polo Concello da Coruña e ten a súa sede no Pazo da Ópera da cidade herculina.

Foi premiada, entre outros galardóns coa Medalla de Ouro da Real Academia Galega de Belas Artes e é Premio Cultura Galega da Música 2010.


Noticia extraída do Nº 321 de Betanzos e a súa comarca

Novas relacionadas


ABERTO O PRAZO DE SOLICITUDE DAS AXUDAS MUNICIPAIS PARA OS AUTÓNOMOS E MICROPEMES DE BETANZOS AFECTADOS POLA COVID-19

06/07/2020

Os autónomos e micropemes de Betanzos afectados pola crise da Covid-19 poderán solicitar as axudas municipais ata o vindeiro 3 de agosto. O Concello...


leer máis


O CONCELLO ABRE A INSCRICIÓN PARA OS CAMPAMENTOS DE VERÁN E PARA O COMEDOR ESCOLAR

06/06/2020

O Concello de Betanzos abriu o día 3 de xuño o prazo de inscrición para solicitar o servizo de comedor escolar para o próximo curso e para os camp...


leer máis


O CONCELLO OUTORGARÁ AXUDAS DIRECTAS DE ATA 700 EUROS AOS AUTÓNOMOS E PEMES AFECTADOS POLA COVID-19

25/05/2020

Ata 700 euros poderán recibir os autónomos e pemes que tiveron que cesar a súa actividade ou que viron drasticamente reducidos os seus ingresos dur...


leer máis


O CONCELLO INICIA UN PLAN DE MOBILIDADE PEONIL QUE RECOMENDA O USO DAS BEIRARRÚAS NUN SÓ SENTIDO DE CIRCULACIÓN

13/05/2020

Camiñar polas beirarrúas nun só sentido de circulación para reducir o contacto entre persoas é a recomendación que lanza o Concello nestes prime...


leer máis