A Xunta pon en marcha a campaña Bono Activa Comercio a partir do 26 de abril

A Xunta de Galicia, en colaboración coa Federación Galega de Comercio e coas Asociacións Provinciais, acaba de poñer en marcha a campaña Bono Activa Comercio para incentivar o consumo nos establecementos comerciais de proximidade.

A iniciativa permitirá que cada cliente dispoña dun bono de 30 euros que poderá ir descontando ao realizar as súas compras nos comercios adheridos á campaña, que se identificarán mediante un distintivo.

Os establecementos comerciais que desexen sumarse á proposta deberán adherirse a través deste enlace. O prazo de adhesión estará aberto ata o 1 de setembro de 2024.

Os clientes poderán descargar os bonos desde o 26 de abril ata o 15 de setembro, ou ata que se esgote o crédito de 2,5 millóns de euros, para beneficiarse dos descontos.

Estableceranse tres tramos de gasto nos que se aplicarán os descontos. Para compras entre 20 e 30 euros descontaranse 5 euros; entre 30 e 50 euros o desconto será de 10 euros; e para compras iguais ou superiores a 50 euros o desconto será de 15 euros.

Os bonos deixarán de funcionar no momento no que o importe total dos descontos realizados acade os 2,5 millóns de euros que a Xunta aporta para esta iniciativa. A partir dese momento, os bonos xa descargados non poderán utilizarse aínda que teñan saldo pendente.

Tanto os comerciantes como os clientes poden completar a información neste enlace.