Os premiados da campaña de verán de ACEBE CCA xa poden recoller os seus regalos

A sede de ACEBE CCA acolleu o 4 de xullo o sorteo dos 32 premios da súa campaña de verán "Betanzos énchese de soles", ante o notario Óscar López Doval e coa presenza da presidenta de ACEBE CCA, María Luisa Pérez, da vicepresidenta, Claudia Marques, e da secretaria, Eva García.

As persoas que resultaran gañadoras dalgún dos 32 regalos que se sortearon terán ata as 14.00 horas do 22 de xullo para contactar coa asociación, no teléfono 981 774 574, ou de forma presencial nas oficinas situadas na Praza Mestre José Dapena número 1, e presentar o resgardo da cartilla para recibir o seu agasallo. O horario de atención ao público das oficinas é de luns a venres de 10.00 a 14.00 horas. Pode consultar aquí a listaxe de números e premios.

Os regalos foron mercados pola asociación en 32 negocios asociados e están valorados en 1.200 euros. Os establecementos socios de ACEBE CCA repartiron durante a campaña 11.200 cartillas que os clientes tiñan que encher con pegatinas de soles e depositalas en calquera dos negocios asociados ou na sede da asociación, quedándose co resgardo para poder reclamar o seu premio.

A campaña de verán organizada por ACEBE CCA é un proxecto cofinanciado pola Xunta de Galicia, a Deputación da Coruña, o Concello de Betanzos e Gadis.