Remata a campaña de envíos gratuítos para vendas en liña na que se inscribiron 20 comercios

O vindeiro 30 de setembro finaliza a campaña de envíos gratuítos para as vendas en liña que ACEBE CCA puxo en marcha en abril deste ano e da que se beneficiaron unha vintena de establecementos asociados.

Esta prestación, exclusiva para comercios, permitiu que os negocios inscritos puidesen realizar envíos de balde das vendas realizadas a través das súas páxinas web ou das redes sociais. Os comerciantes que participaron na iniciativa valoraron a campaña e subliñaron a vantaxe competitiva no comercio en liña que lles aportou este servizo ao non ter que asumir o custe do envío nin o empresario nin os clientes.

Ata o 31 de agosto realizáronse un total de 246 envíos a través desta campaña e a directiva de ACEBE CCA estima que ata a data de finalización poderá chegar aos 280.

O servizo estivo subvencionado pola Xunta de Galicia a través das Subvencións ás asociacións de comerciantes sen fins de lucro para a dinamización dos centros comerciais abertos de Galicia.

A directiva de ACEBE CCA manifestou o seu interese en retomar o vindeiro ano esta proposta no caso de que se convoque unha nova subvención para esta finalidade.