Medio rural apoia o Viño da Terra de Betanzos coa creación dunha adega experimental

A Consellería de Medio Rural apoia con 120.000 euros a instalación dunha adega experimental no Centro de Experimentación Agroforestal de Guísamo, no que se realizarán microvinificacións das variedades tradicionais da comarca de Betanzos, procedentes do propio viñedo que se está a ampliar, tamén co apoio da Consellería.
Ademais, a Asociación Sectorial de Viticultores e Adegueiros de Betanzos están a pór en marcha accións de apoio ó proceso de dinamización do tecido socioeconómico relacionado coa Indicación Xeográfica Viño da Terra de Betanzos, mediante a colaboración con outras institucións como a Fundación Juana de Vega para a valorización da variedade autóctona Blanco Lexítimo. Tamén participan en actos de promoción como catas ou a recente asistencia á I Festa da Tortilla na que contaron co apoio do Concello e onde o único viño que se comercializou foi o das cinco adegas que ata o momento están amparadas na Indicación Xeográfica Viño da Terra de Betanzos.