VOLVE O CONCURSO “ENCHE BETANZOS DE GLOBOS” ORGANIZADO POR ACEBE CCA

ACEBE CCA organiza en agosto a segunda edición do concurso “Enche Betanzos de globos” con senllos premios de 30 euros para as categorías infantil e adulto.

O éxito de participación da primeira edición do concurso “Enche Betanzos de globos”, celebrada o ano pasado, fixo que a directiva de ACEBE CCA acordase organizar de novo este certame que se desenvolverá ao longo do mes de agosto.

As persoas que desexen participar deberán confeccionar un globo en calquera formato: maqueta, manualidade, debuxo, cartaz... e levalo a algún dos establecementos asociados que participen na iniciativa para que o expoña no seu escaparate ou nalgún lugar visible do seu local. O concursante terá que facer unha fotografía do seu globo no establecemento onde se expoña e enviala ao correo electrónico betanzosacebe@gmail.com xunto cos seus datos de contacto.

O prazo para enviar as fotografías será entre o 9 e o 27 de agosto. O día 29, un xurado composto por membros da directiva de ACEBE CCA reunirase para elixir aos gañadores. Valorarase que sexa orixinal e que non participara na edición anterior do certame celebrada o pasado ano.

As persoas gañadoras daranse a coñecer a través das redes sociais de ACEBE CCA e no número de setembro de "Betanzos e a súa comarca" e o persoal da asociación contactará cos premiados para entregarlles os cheques.

Establécense dúas categorías, infantil e adulto, con idéntico premio, un cheque de 30 euros para gastar nos negocios asociados a ACEBE CCA.

Negocios colaboradores

Un total de 14 establecementos asociados a ACEBE CCA inscribíronse na iniciativa e ceden os seus escaparates para expoñer os globos. As persoas que desexen participar no certame poderán levar as súas creacións para expoñelas en calquera dos seguintes negocios: Bicos, Colors, Alecrín, O Ekolar, Lencería Alicia, El Cantón Ropa Interior, Libraría Biblos, Óptica Brigantium, Miraquélinda, Dans, Moita Miga, Xoma Kids, Zentral Óptica. Occident e Óptica-Parafarmacia-Herboristería Selgas.

As bases completas do certame poden consultarse aquí.