Volven en novembro os "Días Azuis do comercio galego" con 16.200 euros en premios

A Federación Galega de Comercio e a Xunta de Galicia convocan unha nova edición da campaña "Días Azuis do comercio galego" que se desenvolverá entre o 9 e o 30 de novembro. A iniciativa pon en xogo 16.200 euros en tarxetas regalo para gastar no pequeno comercio de proximidade. En total sortearanse 28 tarxetas prepago regalo de 300 euros (7 por cada provincia) e 52 de 150 euros (13 por provincia) que deberán utilizarse para mercar nos establecementos comerciais tradicionais.

A campaña, que xa se desenvolveu con éxito no mes de setembro, conta coa colaboración das federacións provinciais, as asociacións de comerciantes e os centros comerciais abertos de Galicia.

Para participar, os clientes deberán seguir tres pasos. Primeiro, realizar unha compra nun comercio de proximidade. Segundo, rexistrar a compra realizada na páxina web www.diasazuis.com.Terceiro, gardar o ticket de compra como comprobante.

Ademais, poden contar coa colaboración dos comerciantes para que sexan eles mesmos os que rexistren a compra a través da plataforma www.diasazuis.com/comercios, desta maneira, o cliente duplica as súas posibilidades de gañar un premio.

O sorteo realizarase o día 4 de decembro de 2020 ante notario e a Federación Galega de Comercio comunicarase directamente cos gañadores. Ademais, a listaxe de premiados publicarase tamén na páxina www.diasazuis.com. unha vez realizado o sorteo.